Aap kahte hain ki aap ne kabhi kisi ko rishwat nahi di. Theek hai; Main aap ko ek kissa aap ki hi company ki bataati hun
jis se aap kaa bharam toot sake. Aap ki company mein ek buzurg vyakti the, un kaa naam thaa Mr. Swami, ve dhaarmik vyakti the, maathe par tilak lagaate the. Un ki duty hamesha sadaa airport par hi hoti thi; Reliance ke bade aadhikario ka, jis mein aap aur aap ke tatkaalin priya chhote bhai Anil bhi shaamil the, swagat karne ke liye . Un kaa mukhya kaam tha ki jo bhi Relainace ke kaam mein vighan daale us ki jeb garam karna. Is suchi mein custom commissioner se lekar, police ke sipahi aur yahan tak ki chowkidaar bhi shaamil the.
Yeh Mr. Swami aap ke prasidh kapdaa brand -Vimal - ke muft coupon kaa bhara thaila lekar airport par aate the. In ke paas 500/- rupaye se lekar 50,000/- rupaye tak ke coupan hote the jo saamne vale kaa pad aur haisiyat dekh kar diye jaate the. Yeh sab log apne coupan kaa maal lene ke liye Laffan ke store par line lagaate the. Yeh kaam varsho tak chalaa.Mr. Swami ab is duniya mein nahi hai, Ishwar un ki aatmaa ko shanti de.
Aap ka lakho rupaye kaa kapdaa, kendra aur rajya sarkaaar ke vibhinn adhikariyon ko, apnaa kaam nikaalne ke liye diya jaataa tha. Kya yeh rishwat nahi hai? Aap pratiksha kare, yeh to sirf sanket maatra hai. Jo joker aap ki tulnaa Mahatma Gandhi ke saath kar rahe hain, vo aap ke baar mein kuchh nahi jaanate.